சீனாவின் எழுச்சி, வறுமையிலிருந்து வல்லரசான ஒரு தேசத்தின் வரலாறு!

தற்போது அமெரிக்காவிற்கே சவால் விடும் வல்லரசாகச் சீனா திகழ்ந்தாலும், அதன் வரலாறு கண்ணீரால் எழுதப்பட்டது. குறிப்பாக, 1959 முதல் 1961 வரையிலான காலகட்டத்தில் சீன மக்கள் குடியரசில் ஏற்பட்ட மகாப் பஞ்சம் அந்த நாட்டையே நிலைகுலையச் செய்தது. இப்பஞ்சத்தால் உணவின்றி, பட்டினியால் மக்கள் கொத்துக் கொத்தாக மடிந்தனர். பல கோடி மக்கள் இதில் இறந்ததாகக் கருதப்படுகிறது. இத்தகைய பெரும் வீழ்ச்சியிலிருந்து மீண்டெழுந்த சீனாவைப் பற்றி இனி அறிந்து கொள்வோம்.

இரண்டாம் உலகப் போர் காலகட்டத்தில் சீனாவின் பெரும் பகுதிகளை ஜப்பான் ஆக்கிரமித்திருந்தது. 1945 செப்டம்பர் 2-ஆம் அன்று ஜப்பான் சரணடைந்ததைத் தொடர்ந்து, ஜப்பானிய ஆக்கிரமிப்பிலிருந்து சீன முழுமையாக விடுதலை பெற்றது.

1. விடுதலைப் போராட்டமும் மக்கள் குடியரசு மலர்ச்சியும்

இதற்குப் பிறகு சீனாவில் உள்நாட்டுப் போர் நடைபெற்றது. அதில் கம்யூனிஸ்ட் கட்சி வெற்றி பெற்றது. 1949-ஆம் ஆண்டு அக்டோபர் 1-ஆம் தேதி, சீனா மக்கள் குடியரசாகப் (People’s Republic of China) பிரகடனப்படுத்தப்பட்டது. இந்தத் தேதியையே சீனா தனது தேசிய தினமாகக் கொண்டாடுகிறது. மா சேதுங் (Mao Zedong) தலைமையிலான கம்யூனிஸ்ட் கட்சி முறைப்படி ஆட்சியில் அமர்ந்தது.

2. மாபெரும் பாய்ச்சல் திட்டமும் மகா பஞ்சத்தின் துயரமும்

1958-இல் மா சேதுங் (Mao Zedong) ‘மாபெரும் பாய்ச்சல்’ (Great Leap Forward) என்ற கொள்கையைத் தொடங்கினார். இதில் ‘நில மறுபகிர்வு’ என்ற கொள்கையின் ஊடாகத் தனிநபர் நிலங்கள் மற்றும் கருவிகள் பறிக்கப்பட்டு, ‘மக்கள் கம்யூன்ஸ்’ (People’s Communes) எனப்படும் மிகப்பெரிய கூட்டுப் பண்ணைகளாக மாற்றப்பட்டன. மக்கள் அனைவரும் அரசுக்காக ஒரே இடத்தில் வேலை செய்யக் கட்டாயப்படுத்தப்பட்டனர்.

நில மறுபகிர்வு கொள்கையினால் நிலங்கள் அனைத்தும் அரசாங்கத்திற்குச் சொந்தமானது. இதனால் விவசாயிகளுக்குக் கூலி மட்டுமே வழங்கப்பட்டது. விவசாயிகளுக்கு இதில் எவ்வித லாபமும் கிடைக்காததால், அவர்களின் ஆர்வம் குறைந்து உற்பத்தி வீழ்ச்சியடைந்தது.

அதேபோல் ‘தொழில்துறை மயமாக்கல்’ என்ற கொள்கையைக் கொண்டு வந்து, ஒவ்வொரு வீட்டிலும் ‘கொல்லைப்புற உருக்கு ஆலைகள்’ (Backyard Furnaces) அமைத்து இரும்பு தயாரிக்க உத்தரவிடப்பட்டது. இதற்காக மக்கள் தங்களது விவசாயக் கருவிகள் மற்றும் வீட்டுப் பாத்திரங்களை உருக்கினர். லட்சக்கணக்கான விவசாயிகள் விவசாயத்தைக் கைவிட்டு விட்டு, தொழிற்சாலைப் பணிகளுக்கு மாற்றப்பட்டனர்.

இதன் விளைவாக, விவசாயத்தில் ஆட்கள் இல்லாததால் அறுவடை பாதிக்கப்பட்டு கடும் உணவுப் பற்றாக்குறை ஏற்பட்டது. வீடுகளில் தயாரிக்கப்பட்ட இரும்பு தரம் குறைந்ததாக இருந்ததால், அவை எதற்கும் பயன்படாமல் போனது. மா சேதுங்கின் இந்தக் கொள்கை தோல்வியுற்றதால் மகா பஞ்சம் ஏற்பட்டு, சுமார் 5 கோடி மக்கள் உயிர் இழந்திருக்கலாம் என்று கணிக்கப்படுகிறது.

3. டெங் சியாவுபிங்கின் பொருளாதாரப் புரட்சியும் எழுச்சியும்

1976-இல் மா சேதுங் உடல்நலக்குறைவால் மரணமடைந்த பிறகு, டெங் சியாவுபிங் சீனா கம்யூனிஸ்ட் கட்சியின் தலைவராக ஆட்சிப் பொறுப்பை ஏற்றார். இவர் ‘சீனாவின் நவீன பொருளாதாரத் தந்தை’ என்றும் அழைக்கப்படுகிறார். 1978-ஆம் ஆண்டு டெங் சியாவுபிங் கொண்டு வந்த புரட்சிகரமான கொள்கைகளே சீனாவின் எழுச்சிக்குக் காரணமாக அமைந்தது. சீனாவின் நான்கு முக்கிய துறைகளைப் பலப்படுத்துவதைத் தனது இலக்காக அவர் வைத்தார்.

முதலாவதாக, நில மறுபகிர்வு கொள்கையை ஒழித்து, விவசாயிகளுக்கு நீண்ட காலக் குத்தகைக்கு நிலங்களை வழங்கினார். அரசாங்கத்திற்குக் குறிப்பிட்ட வரியைச் செலுத்திவிட்டு, மீதமுள்ள விளைச்சலை விவசாயிகளே சந்தையில் விற்றுப் பயன் பெறலாம் என்ற கொள்கையைக் கொண்டு வந்தார். இதனால் சீனாவின் விவசாய உற்பத்தி மூன்று மடங்காக அதிகரித்தது.

அரசு நிறுவனங்களுக்கு அதிக சுதந்திரம் வழங்கிய டெங் சியாவுபிங், வெளிநாட்டுத் தொழில்நுட்பங்களை இறக்குமதி செய்யவும், மாணவர்கள் வெளிநாடுகளுக்குச் சென்று படிக்கவும் வழிவகை செய்தார்.

அடுத்ததாக, ‘திறந்த கதவுக் கொள்கை’ (Open Door Policy) சீனாவின் எழுச்சிக்கு மிக முக்கியக் காரணமாக அமைந்தது. வெளிநாட்டு நிறுவனங்கள் சீனாவில் முதலீடு செய்யக் கதவுகள் திறக்கப்பட்டன. மேற்கத்திய நாடுகளின் நவீன இயந்திரங்கள் மற்றும் உற்பத்தி முறைகள் சீனாவிற்குள் வந்தன.

சிறப்புப் பொருளாதார மண்டலங்களை (Special Economic Zones – SEZ) டெங் சியாவுபிங் உருவாக்கினார். இங்கு வரிச் சலுகைகள் வழங்கப்பட்டன. சீனாவில் குறைந்த கூலியில் அதிகத் தொழிலாளர்கள் கிடைத்ததால், உலகளாவிய நிறுவனங்கள் அங்குத் தங்களது தொழிற்சாலைகளை அமைத்தன. இதற்குச் சிறந்த உதாரணமாக ‘ஷென்சென்’ (Shenzhen) நகரைக் கூறலாம்.

1980-களில் ஷென்சென் கிராமம் சிறப்புப் பொருளாதார மண்டலமாக அறிவிக்கப்பட்ட போது, அதன் வருமானம் 3.9 பில்லியனாக இருந்தது. ஆனால் 2024-இல் 390 பில்லியன் டாலர் மதிப்புள்ள பொருட்களை ஏற்றுமதி செய்யும் அளவிற்கு உயர்ந்துள்ளது. இன்று இது 500 பில்லியன் டாலருக்கும் அதிகமான பொருளாதாரத்தைக் கொண்ட உலகளாவிய தொழில்நுட்ப மையமாகத் திகழ்கிறது.

கல்வியிலும் அவர் பெரிய புரட்சியை ஏற்படுத்தினார். இதற்காக 10 ஆண்டுகளாக முடங்கியிருந்த கல்வி முறையை 1986-இல் சீரமைத்தார். அரசாங்கத்தால் வழங்கப்படும் கட்டாயக் கல்வி முறையை அறிமுகப்படுத்தினார்.

டெங் சியாவுபிங் கொண்டு வந்த கொள்கைகளால் சீனாவின் எழுச்சி விண்ணைத் தொட்டது. மிகக் குறுகிய காலத்தில் கோடிக்கணக்கான மக்கள் வறுமையிலிருந்து மீட்கப்பட்டனர். கிராமப்புற மக்கள் வேலை தேடி நகரங்களுக்கு வந்ததால், புதிய பிரம்மாண்ட நகரங்கள் உருவாயின. சீனா தயாரிக்கும் பொருட்கள் உலகின் மூலை முடுக்கெல்லாம் சென்றடைந்தன. 2026-ஆம் ஆண்டு தரவுகளின்படி, உலகின் மொத்த உற்பத்தியில் நான்கில் ஒரு பகுதி (சுமார் 30 சதவீதம்) சீனாவிலேயே தயாராகிறது.

4. சீனாவின் எழுச்சி: உலகளாவிய உற்பத்தி மையமாக உருவெடுத்த வரலாறு

2001-ஆம் ஆண்டில் சீனா உலக வர்த்தக அமைப்பில் (WTO) இணைந்தது ஒரு மிகப்பெரிய திருப்புமுனையாக அமைந்தது. இதன் மூலம் சீனாவின் பொருட்கள் மிகக் குறைந்த வரி விகிதத்தில் உலக நாடுகளுக்கு ஏற்றுமதி செய்யப்பட்டன.

சீனா தனது வருமானத்தைப் போக்குவரத்து மற்றும் கட்டுமானத்தில் முதலீடு செய்தது. இதன் விளைவாக, அதிவேக இரயில்கள், பிரம்மாண்ட மேம்பாலங்கள் மற்றும் நவீன துறைமுகங்கள் அமைக்கப்பட்டன.

இதன் காரணமாக, கடந்த 40 ஆண்டுகளில் சீனா சுமார் 80 கோடி மக்களைக் கடும் வறுமையிலிருந்து மீட்டுள்ளது. இது மனித வரலாற்றிலேயே மிகக் குறுகிய காலத்தில் ஒரு நாடு அடைந்த மிகப்பெரிய சமூக மாற்றமாகும்.

5. சீனாவின் 5 மாபெரும் பொருளாதாரத் தூண்கள்

நவீன சீனாவின் பொருளாதார எழுச்சியில் ஐந்து நிறுவனங்கள் உலகளாவிய ஆதிக்கத்தைச் செலுத்தி வருகின்றன. முதலாவதாக, Alibaba நிறுவனம் உலகளாவிய மின்னணு வர்த்தகத்தில் (E-commerce) ஒரு மிகப்பெரிய புரட்சியை ஏற்படுத்தியுள்ளது.

இரண்டாவதாக, Tencent நிறுவனம் சமூக ஊடகங்கள் மற்றும் மென்பொருள் துறையில் (WeChat) முன்னணியில் உள்ளது. மூன்றாவதாக, Huawei நிறுவனம் 5G மற்றும் தொலைத்தொடர்பு தொழில்நுட்பத்தில் உலக நாடுகளுக்கே பெரும் சவாலாகத் திகழ்கிறது.

நான்காவதாக, BYD நிறுவனம் மின்சார வாகன (EV) உற்பத்தியில் டெஸ்லா நிறுவனத்தையே மிஞ்சி, உலக அளவில் முதலிடத்தைப் பிடித்துள்ளது. ஐந்தாவதாக, Xiaomi நிறுவனம் ஸ்மார்ட்போன் மற்றும் நுகர்வோர் மின்னணு பொருட்களில் ஆசியா மற்றும் ஐரோப்பிய சந்தைகளில் பெரும் ஆதிக்கம் செலுத்தி வருகிறது. இந்த ஐந்து நிறுவனங்களின் அசுர வளர்ச்சி, சீனாவை இன்று ஒரு தொழில்நுட்ப வல்லரசாக உலக அரங்கில் நிலைநிறுத்தியுள்ளது.

1960-களில் ‘மகா பஞ்சத்தினால்’ பல கோடி உயிர்களைப் பலிகொடுத்து நிலைகுலைந்து போயிருந்த சீனா, இன்று உலகையே வியக்க வைக்கும் வல்லரசாக மாறியுள்ளது. டெங் சியாவோபிங்கின் சீர்திருத்தங்களும், ‘திறந்த கதவுக் கொள்கையும்’ அந்த நாட்டின் தலையெழுத்தையே மாற்றின.

வறுமையின் பிடியில் இருந்த ஒரு தேசம், இன்று ஷென்சென் (Shenzhen) போன்ற நவீன நகரங்களாலும், அலிபாபா, பி.வை.டி (BYD) போன்ற உலகத்தரம் வாய்ந்த நிறுவனங்களாலும் உலகப் பொருளாதாரத்தின் அச்சாணியாகத் திகழ்கிறது. 2026-ஆம் ஆண்டின் கணக்குப்படி, உலகின் மொத்த உற்பத்தியில் சுமார் 30 சதவீதத்திற்கும் மேல் பங்களித்து ‘உலகின் தொழிற்சாலை’ என்ற பெயரையும் சீனா பெற்றுள்ளது. வீழ்ச்சியிலிருந்து ஒரு நாடு எப்படி விஸ்வரூபம் எடுக்கலாம் என்பதற்குச் சீனாவின் எழுச்சி ஒரு மிகச்சிறந்த பாடமாகும்.

அடிக்கடி கேட்கப்படும் கேள்விகள் (FAQ) : சீனாவின் எழுச்சி