GDP per Capita என்றால் என்ன? உலக நாடுகளின் பொருளாதார நிலை!

இன்றைய காலகட்டத்தில் ஒரு நாட்டின் வளர்ச்சியைப் பற்றிப் பேசும்போதோ அல்லது எந்த நாடு பணக்கார நாடு என்று ஒப்பிடும்போதோ, “ஜிடிபி” (GDP) மற்றும் “தனிநபர் மொத்த உள்நாட்டு உற்பத்தி” (GDP per Capita) ஆகிய சொற்களை நாம் அடிக்கடி கேள்விப்படுகிறோம்.

ஆனால், பொருளாதாரக் கலைச்சொற்கள் நிறைந்த இந்த விஷயங்கள் சாதாரண மக்களுக்குப் புரிவது கடினமாக இருக்கலாம். இந்த உலகத்தில் எந்த நாட்டு மக்கள் அதிக பொருளாதாரப் பலத்துடன் இருக்கிறார்கள்? உலக நாடுகள் பொருளாதார ரீதியாக எப்படி வகைப்படுத்தப்படுகின்றன? வாருங்கள், மிகவும் எளிமையான முறையில் பார்ப்போம்.

GDP per Capita என்றால் என்ன?

இதை மிக எளிதாகப் புரிந்து கொள்ள ஒரு குடும்பத்தை உதாரணமாக எடுத்துக்கொள்வோம்.

ஒரு குடும்பத்தில் நான்கு உறுப்பினர்கள் இருக்கிறார்கள் என்று வையுங்கள். அந்தக் குடும்பத்தின் ஒட்டுமொத்த மாத வருமானம் (Income) 100,000 ரூபாய். இப்போது அந்தக் குடும்பத்தின் சராசரி தனிநபர் வருமானம் எவ்வளவு என்று கேட்டால், மொத்த வருமானத்தை குடும்ப உறுப்பினர்களின் எண்ணிக்கையான 4 ஆல் வகுப்போம். அப்போது ஒரு நபருக்கு 25,000 ரூபாய் கிடைக்கும். இதுதான் அந்தக் குடும்பத்தின் தனிநபர் வருமானம்.

இதே சூத்திரத்தை (Formula) ஒரு நாட்டிற்குப் பயன்படுத்தினால் அதுதான் “GDP per Capita”.

1. GDP (Gross Domestic Product – மொத்த உள்நாட்டு உற்பத்தி):
   ஒரு நாட்டின் எல்லைக்குள், ஒரு குறிப்பிட்ட வருடத்திற்குள் உற்பத்தி செய்யப்படும் பொருட்கள்
   மற்றும் சேவைகளின் (Goods and Services) ஒட்டுமொத்த பண மதிப்பு ஆகும்.
2. GDP per Capita (தனிநபர் மொத்த உள்நாட்டு உற்பத்தி):
   நாட்டின் ஒட்டுமொத்த GDP மதிப்பை, அந்த நாட்டின் மொத்த மக்கள் தொகையால் (Total Population) வகுக்கும்போது கிடைக்கும் சராசரி மதிப்பு ஆகும்.

இதன் சூத்திரம்:
GDP per Capita = நாட்டின் மொத்த GDP / நாட்டின் மொத்த மக்கள் தொகை

இது ஒரு நாட்டின் ஒவ்வொரு தனிநபருக்கும் கிடைக்கும் உண்மையான வருமானம் அல்ல. ஆனால், அந்த நாட்டின் பொருளாதார பலத்தையும், மக்களின் சராசரி வாழ்க்கைத் தரத்தையும் (Standard of Living) உலகளவில் ஒப்பிட்டுப் பார்க்க உதவும் மிக முக்கியமான அளவீடாகும். தற்போதைய ஒட்டுமொத்த உலகத்தின் சராசரி தனிநபர் GDP மதிப்பு 14,405.8 டாலர்களாக (Current US$) உள்ளது.

உலக வங்கி நாடுகளை எப்படி வகைப்படுத்துகிறது? (How World Bank Classifies Countries)

உலக வங்கி (World Bank) வெறும் ஏழை நாடு, பணக்கார நாடு என்று குத்துமதிப்பாகப் பிரிக்காமல், ஒவ்வொரு நாட்டின் தனிநபர் வருமான எல்லையை (Threshold) அடிப்படையாகக் கொண்டு, உலகப் பொருளாதாரத்தை நான்கு துல்லியமான பிரிவுகளாக (Income Levels) வகைப்படுத்துகிறது.

எளிதாகப் புரிந்து கொள்ளும் வகையில், அந்த நான்கு பிரிவுகளின் வருமான வரம்புகள் மற்றும் அந்த வரம்பிற்குள் மட்டுமே சரியாக அடங்கும் முக்கிய நாடுகளின் உதாரணங்களை இங்கே பார்ப்போம்.

உயர் வருவாய் நாடுகள் (High-Income Countries)

இந்த பிரிவில் அதிநவீன தொழில்நுட்பம், வலுவான நிதித்துறை மற்றும் மிகச் சிறந்த தொழில்துறை உள்கட்டமைப்புகளைக் கொண்ட நாடுகள் அடங்கும்.

வருமான வரம்பு (Income Range): தனிநபர் வருமானம் 14,005 டாலர்களுக்கும் (Current US$)
மேல் உள்ள நாடுகள் இதில் அடங்கும். வரம்பிற்குள் இருக்கும் முக்கிய 10 நாடுகள் :

1. மொனாகோ (Monaco – $288,001.6)
2. லீக்டன்ஸ்டைன் (Liechtenstein – $220,167.2)
3. லக்சம்பர்க் (Luxembourg – $147,252.2)
4. அயர்லாந்து (Ireland – $131,593)
5. சுவிட்சர்லாந்து (Switzerland – $114,769)
6. சிங்கப்பூர் (Singapore – $98,814)
7. ஐஸ்லாந்து (Iceland -$98,324)
8. நோர்வே (Norway – $94,594 )
9. ஐக்கிய அமெரிக்கா (United States – $90,026.5)
10. டென்மார்க் (Denmark – $76,970)

மேல்-மத்திய வருவாய் நாடுகள் (Upper-Middle Income Countries)

வேகமாக வளர்ந்து வரும் தொழில்துறையையும், நடுத்தர அளவிலான பொருளாதாரப் பலத்தையும் கொண்ட நாடுகள் இந்த பிரிவில் வகைப்படுத்தப்படுகின்றன.

வருமான வரம்பு (Income Range): தனிநபர் வருமானம் 4,516 டாலர்கள் முதல் 14,004 டாலர்கள் (Current US$) வரை மட்டுமே உள்ள நாடுகள் இதில் அடங்கும். (14,000 டாலரைத் தாண்டிய நாடுகள் இதில் சேர்க்கப்படவில்லை). வரம்பிற்குள் இருக்கும் முக்கிய 5 நாடுகள் :

1. பிரேசில் (Brazil – $10,713)
2. கியூபா (Cuba – $9,605)
3. கொலம்பியா (Colombia – $8,561)
4. ஆர்மீனியா (Armenia – $9,474)
5. பெரு (Peru – $9,684)

கீழ்-மத்திய வருவாய் நாடுகள் (Lower-Middle Income Countries)

பொருளாதார ரீதியாக இப்போதுதான் வேகமாக வளர்ந்து வரும் நாடுகள் (Developing Countries) இந்த பிரிவில் அடங்குகின்றன.

வருமான வரம்பு (Income Range): தனிநபர் வருமானம் 1,146 டாலர்கள் முதல் 4,515 டாலர்கள் வரை மட்டுமே உள்ள நாடுகள் இதில் அடங்கும். வரம்பிற்குள் இருக்கும் முக்கிய 5 நாடுகள் :

1. பூட்டான் (Bhutan – $4492)
2. லெபனான் (Lebanon – $4473)
3. பிலிப்பைன்ஸ் (Philippines – $4,170)
4. எஸ்வாட்டினி (Eswatini – $4,4108)
5. வெனிசுலா (Venezuela -$3494)

குறைந்த வருவாய் நாடுகள் (Low-Income Countries)

உள்நாட்டுப் பிரச்சினைகள், வறுமை அல்லது முறையான தொழில்துறை இல்லாததால் பொருளாதார ரீதியாக மிகவும் பின்தங்கிய நாடுகள் இந்த பிரிவில் வகைப்படுத்தப்படுகின்றன.

வருமான வரம்பு (Income Range): தனிநபர் வருமானம் 1,145 டாலர்களுக்கும் குறைவாக இருக்கும் நாடுகள் இதில் அடங்கும். வரம்பிற்குள் இருக்கும் முக்கிய 5 நாடுகள் (Examples):

1. சோமாலியா (Somalia – $661)
2. மடகாஸ்கர் (Madagascar – $599)
3. ஆப்கானிஸ்தான் (Afghanistan – $416.9)
4. மத்திய ஆப்பிரிக்க குடியரசு (Central African Republic – $556)
5. புருண்டி (Burundi – $233)

தனிநபர் மொத்த உள்நாட்டு உற்பத்தி (GDP per Capita) என்பது ஒரு நாட்டின் பொருளாதார
வலிமையையும், அங்கு வாழும் மக்களின் சராசரி வாழ்க்கைத் தரத்தையும் (Standard of Living) அளவிட உதவும் ஒரு மிகச் சிறந்த கருவி (Tool) ஆகும்.

ஆனால், இந்த அளவீட்டை வைத்துக்கொண்டு ஒரு நாட்டில் உள்ள ஒவ்வொரு குடிமகனும் இந்தத் தொகையை அப்படியே மாத அல்லது வருட வருமானமாகப் பெறுகிறார்கள் என்று நாம் தவறாகப் புரிந்து கொள்ளக் கூடாது. ஏனெனில், நாட்டில் உள்ள ஏழை மற்றும் பணக்காரர்களுக்கு இடையிலான வருமான ஏற்றத்தாழ்வுகளை (Income Inequality) இந்த ஜிடிபி அளவீடு வெளிக்காட்டுவதில்லை.

இருந்தபோதிலும், ஒரு நாடு கடந்த காலத்தை விட இப்போது பொருளாதார ரீதியாக முன்னேறியுள்ளதா? உலக நாடுகளின் வரிசையில் நம் நாடு எந்த நிலையில் உள்ளது? என்பதைத் துல்லியமாக ஒப்பிட்டுப் பார்க்க உலக வங்கியின் (World Bank) இந்த அதிகாரபூர்வத் தரவுகள் நமக்கு பெரிதும் உதவுகின்றன. சரியான பொருளாதாரக் கொள்கைகளும் (Economic Policies), தொழில்நுட்ப வளர்ச்சியும் (Technological Advancement) இணையும் போது எந்த ஒரு நாடும் உயர் வருவாய் கொண்ட பணக்கார நாடாக மாற முடியும் என்பதே வரலாறு நமக்குக் காட்டும் உண்மையாகும்.

GDP per Capita என்றால் என்ன? FAQs: