ஒரு காலத்தில் நிலக்கரியும் காடுகளும் நிறைந்திருந்த பிரதேசமான அமெரிக்கா, இன்று பொருளாதாரத்திலும் தொழில்நுட்பத்திலும் உச்சம் தொட்ட நாடாகத் திகழ்கிறது. அதுமட்டுமில்லாமல், இராணுவ பலத்திலும் அந்நாடு முதலிடத்தில் உள்ளது. இதற்குச் சான்று பகிரும் வகையிலேயே, அமெரிக்காவின் இராணுவ பட்ஜெட் 884 பில்லியன் டாலராக அமைந்துள்ளது. இது இந்திய ரூபாய் மதிப்பில் தோராயமாக 80 லட்சம் கோடிக்கும் மேல் வரும். உலக நாடுகள் அனைத்தும் இராணுவத்திற்காகச் செலவிடும் தொகையில் இது சுமார் 40 சதவீதமாகும். அமெரிக்கப் பொருளாதார வளர்ச்சி எவ்வளவு அடைந்துள்ளது என்று புரிந்திருக்கும்.
சீனா இராணுவத்திற்காக ஒதுக்கியுள்ள 277 பில்லியன் டாலர் (தோராயமாக 25 லட்சம் கோடி ரூபாய்) தொகையுடன் இரண்டாம் இடத்திலும், இந்தியா 84 பில்லியன் டாலர் (7.8 லட்சம் கோடி ரூபாய்) தொகையுடன் மூன்றாம் இடத்திலும் உள்ளன. இப்போது உங்களுக்குப் புரிந்திருக்கும், அமெரிக்கா எவ்வளவு பொருளாதார பலம் கொண்ட நாடு என்று! இவ்வளவு பொருளாதார பலம் கொண்ட நாடாக அமெரிக்கா எதனால் இன்றுவரை நீடிக்கிறது என்பதைப் பற்றி இனிப் பார்ப்போம்.
| நாடு | இராணுவ பட்ஜெட் (பில்லியன் $) | இந்திய ரூபாய் மதிப்பில் (தோராயமாக) |
| அமெரிக்கா | 884 | 80 லட்சம் கோடி |
| சீனா | 277 | 25 லட்சம் கோடி |
| இந்தியா | 84 | 7.8 லட்சம் கோடி |
1. குடியேற்ற நாடாக இருந்து வல்லரசாக மாறிய கதை
1492-ஆம் ஆண்டு கொலம்பஸால் அமெரிக்கா என்ற நாடு உலகிற்கு அறிமுகமாகிறது. கொலம்பஸின் வருகைக்குப் பிறகு, பல ஐரோப்பிய நாடுகள் அமெரிக்காவைக் கைப்பற்றப் போட்டியிட்டன. ஸ்பெயின் நாடு தெற்கு மற்றும் மத்திய அமெரிக்காவையும், பிரான்ஸ் நாடு கனடா மற்றும் மத்திய அமெரிக்காவின் சில பகுதிகளையும் கைப்பற்றின. பிரித்தானியா தற்போதைய அமெரிக்காவின் கடற்கரைப் பகுதிகளைக் கைப்பற்றி ஆட்சி செய்தது.
1776 ஜூலை 4-இல் அமெரிக்கா விடுதலை அடைந்தது. பின்னர் 1783-இல் நடந்த பாரிஸ் ஒப்பந்தத்தின் மூலம், பிரிட்டன் அமெரிக்காவின் விடுதலையை அதிகாரப்பூர்வமாக ஏற்றுக்கொண்டது.
அமெரிக்கா, திறமையான மக்கள் எந்த நாட்டைச் சேர்ந்தவர்களாக இருந்தாலும் அவர்களுக்குக் குடியுரிமை வழங்கி, அவர்களைத் தங்கள் நாட்டு மக்களாகவே பார்க்கும் தன்மையைக் கொண்டுள்ளது. இதனாலேயே பல நாட்டு மக்கள் குடிபெயர்ந்து வாழக்கூடிய நாடாக அமெரிக்கா உள்ளது. இதன் விளைவாக, அந்த மக்களும் முன்னேறி, அமெரிக்காவின் முன்னேற்றத்திற்கும் அது ஒரு முக்கியக் காரணமாக மாறியது.
உலகமே போரில் ரத்தம் சிந்திச் சிதைந்து கொண்டிருந்த முதலாம் உலகப் போர் காலத்தில், அமெரிக்கா நடுநிலை வகித்தது. அப்போது பிரிட்டன் மற்றும் பிரான்ஸ் போன்ற நாடுகளுக்கு ஆயுதங்கள் மற்றும் உணவுப் பொருட்களை விற்பனை செய்து மிகப்பெரிய லாபத்தை ஈட்டியது. இதனால் அமெரிக்கா மற்ற நாடுகளுக்குக் கடன் கொடுக்கும் நாடாக மாறியது. மற்ற நாடுகள் தங்களது செல்வம் மற்றும் இராணுவ பலத்தை இழந்த பிறகே அமெரிக்கா போரில் குதித்தது.
இரண்டாம் உலகப் போரிலும் நட்பு நாடுகளுக்கு அமெரிக்கா பெருமளவு ஆயுதங்களை வழங்கியது. இதனாலேயே அமெரிக்காவில் போராயுதங்கள் தயாரிக்கும் தொழிற்சாலைகள் அதிகளவில் ஆரம்பிக்கப்பட்டு, அந்த நாட்டின் வேலையில்லாத் திண்டாட்டத்தை ஒழித்தது. இரண்டாம் உலகப் போரின் இறுதியிலேயே அமெரிக்கா நேரடியாகப் போரில் இறங்கியது.
2. அமெரிக்காவின் தொழில்நுட்ப வளர்ச்சி
ஐரோப்பாவும் ஆசியாவும் போரினால் சிதைந்திருந்த போது, ஜெர்மனியின் மிகச்சிறந்த விஞ்ஞானிகளை அமெரிக்கா ரகசியமாகத் தன் நாட்டிற்கு அழைத்து வந்தது. அவர்கள் அமெரிக்காவின் விண்வெளி ஆராய்ச்சி மற்றும் ஏவுகணைத் தொழில்நுட்பத்திற்கு வலுவான அடித்தளம் அமைத்தனர். உலகம் முழுவதிலும் இருந்து தேடி வந்த அறிஞர்களையும், உழைப்பாளிகளையும் அமெரிக்கா இருகரம் கூப்பி வரவேற்றுத் தன்னுள் இணைத்துக்கொண்டது.
பல்வேறு கலாச்சாரங்களும் ஒரு புள்ளியில் இணைந்த போது, அமெரிக்கா தொழில்நுட்பத்தில் கொடிகட்டிப் பறந்தது. ஒவ்வொரு மனிதனின் உழைப்பிற்கும் உரிய அங்கீகாரம் கிடைத்ததே அமெரிக்க நாட்டின் அசுர வளர்ச்சிக்கு முக்கியக் காரணமாக அமைந்தது.
உலகில் முதல் கணினியை அமெரிக்கா உருவாக்கியது. 1947-ஆம் ஆண்டில் டிரான்சிஸ்டர் (Transistor) கண்டுபிடிக்கப்பட்டது. இதுவே இன்றைய ஸ்மார்ட்போன்கள் மற்றும் கணினிகள் உருவாக மூலகாரணமாக அமைந்தது.
அமெரிக்க இராணுவத்தின் ஆராய்ச்சிப் பிரிவான டார்பா (DARPA), போர்க்காலத் தொடர்பிற்காக அர்பாநெட் (ARPANET) என்ற வலை அமைப்பை உருவாக்கியது. இதுவே இன்று நாம் பயன்படுத்தும் இணையத்திற்கு (Internet) அடித்தளமாக உள்ளது.
அணு ஆயுதத் தயாரிப்பில் கிடைத்த அனுபவத்தைப் பயன்படுத்தி, அணுமின் நிலையம் மூலம் மின்சாரம் தயாரிப்பதிலும், மருத்துவத் துறையில் கதிரியக்கச் சிகிச்சையைக் கொண்டு வருவதிலும் அமெரிக்கா முன்னிலை வகித்தது. இதனால் அமெரிக்கப் பொருளாதார வளர்ச்சி உச்சம் தொட்டது.
3. பெட்ரோ-டாலர் ஒப்பந்தம்
பெட்ரோ-டாலர் ஒப்பந்தம் என்பது உலக நாடுகள் கச்சா எண்ணெயை வாங்குவதற்கு டாலரை மட்டுமே பயன்படுத்த வேண்டும் என்ற ஒப்பந்தமாகும். 1974-ஆம் ஆண்டு ரிச்சர்ட் நிக்சன் ஆட்சியில், சவுதி அரேபியாவுடன் அமெரிக்கா இந்த ரகசிய ஒப்பந்தத்தைச் செய்தது. இதற்குப் பதிலாக சவுதி அரேபியாவிற்குத் தேவையான இராணுவப் பாதுகாப்பு மற்றும் நவீன ஆயுதங்களை வழங்குவதாக அமெரிக்கா உறுதியளித்தது.
பின்னர், எண்ணெய் ஏற்றுமதி செய்யும் நாடுகளின் கூட்டமைப்பான ‘ஒபெக்’ (OPEC) நாடுகள் முழுவதும் இம்முறையைப் பின்பற்றின. இதனால் உலக நாடுகளுக்குக் கச்சா எண்ணெய் தேவைப்பட்டால், அவை டாலரைச் சேமிக்க வேண்டிய கட்டாயத்திற்குத் தள்ளப்பட்டன.இதனால் அமெரிக்கப் பொருளாதார வளர்ச்சி உச்சம் தொட்டது.
பெட்ரோ-டாலர் ஒப்பந்தத்திற்கு எதிராக முளைத்தவர்கள் மௌனமாக்கப்பட்டார்கள். கச்சா எண்ணெயை டாலரின் பிடியிலிருந்து விடுவிக்க முயன்றவர்களின் கதை மட்டுமல்ல, அவர்களின் நாடுகளின் வரலாறும் இரத்தத்தாலும் கண்ணீராலும் எழுதப்பட்டன.
ஈராக் அதிபர் சதாம் உசேன் தன் நாட்டின் எண்ணெயை ‘யுரோ’ (Euro) நாணயத்திற்கு விற்க முடிவு செய்தபோது, “பேரழிவு ஆயுதங்களை வைத்திருக்கிறார்” எனும் பொய்யான காரணத்தைக் காட்டி அந்த நாடு நசுக்கப்பட்டது. அவர் தூக்கிலிடப்பட்ட பிறகும் அங்கு பேரழிவு ஆயுதங்கள் கண்டுபிடிக்கப்படவில்லை.
லிபியாவின் சிங்கம் என்று அழைக்கப்பட்ட முஅம்மர் கடாபி ஒரு படி மேலே சென்று, ஆப்பிரிக்க மற்றும் அரபு நாடுகளுக்கென “தங்கத் தினார்” (Gold Dinar) எனும் பொது நாணயத்தை உருவாக்கத் துணிந்தார். லிபியாவில் ஏற்பட்ட உள்நாட்டுப் போர் மற்றும் நேட்டோ (NATO) படைகளின் தலையீட்டால் அந்தத் தலைவரே மண்ணோடு மண்ணானார்.
உலகிலேயே அதிக எண்ணெய் வளத்தைக் கொண்ட நாடான வெனிசுலா, ‘பெட்ரோ’ (Petro) எனும் டிஜிட்டல் நாணயத்தைத் தொடங்கியபோது, அமெரிக்கா அந்த நாட்டின் மீது பொருளாதாரத் தடையைப் போட்டது. அதுமட்டுமல்லாது, அமெரிக்காவிற்குச் சட்டவிரோதமாகப் போதைப்பொருளைக் கடத்துகிறார் என்ற குற்றச்சாட்டை வைத்து, வெனிசுலாவின் முன்னாள் அதிபரையே பதவியில் இருக்கும்போதே கைது செய்து அமெரிக்காவிற்கு அழைத்துச் சென்றது.
தற்போதும் அமெரிக்காவும் இஸ்ரேலும் இணைந்து ஈரானுக்கு எதிராக நடத்தும் மோதல்கள், சீனாவுக்கு ஈரான் கச்சா எண்ணெயை விற்பதால்தான் என்று சில ஆய்வாளர்கள் கூறுகின்றனர். உலகப் பொருளாதார வீதியில் டாலரை எதிர்ப்பது, எரியும் தணலைத் வெறும் கையால் அணைக்க முயல்வதைப் போன்றது என்பதே நிதர்சனம்.
4. நவீன உலகின் புதிய நிறுவனங்கள்
அமெரிக்காவின் பொருளாதார வலிமைக்கு வெறும் கச்சா எண்ணெய் மட்டும் காரணமல்ல; இன்று உலகையே ஆளும் சில பெருநிறுவனங்களும் முக்கியக் காரணமாக உள்ளன. அவற்றுள் முக்கியமான ஏழு நிறுவனங்கள் இதோ:
- மைக்ரோசாப்ட் (Microsoft): இது மென்பொருள் மற்றும் கிளவுட் கம்ப்யூட்டிங் (Cloud Computing) துறையைச் சேர்ந்த நிறுவனமாகும். முக்கியமாக கணினிகளுக்கான ‘விண்டோஸ்’ (Windows) மற்றும் உலகையே வியக்க வைக்கும் ‘ChatGPT’ உடன் கைகோர்த்து, செயற்கை நுண்ணறிவு (AI) பந்தயத்தில் முதலிடத்தில் உள்ளது.
- ஆப்பிள் (Apple): இந்நிறுவனம் ஐபோன் (iPhone) மற்றும் மேக்புக் (MacBook) போன்ற சாதனங்கள் மூலம் உலகச் சந்தையில் பெரும் லாபத்தை ஈட்டுகின்றது. இவர்களது மென்பொருள் கட்டமைப்பு மிகவும் பாதுகாப்பானது.
- என்விடியா (NVIDIA): செமிகண்டக்டர் மற்றும் சிப் (Chip) தயாரிப்பில் இது ஒரு முக்கிய நிறுவனமாகும். செயற்கை நுண்ணறிவு (AI) வேலை செய்வதற்குத் தேவையான அதிநவீன GPU சிப்களை இவர்களே தயாரிக்கின்றனர். இன்றைய ஏஐ புரட்சிக்கு இவர்களே அச்சாணி.
- ஆல்பபெட் (Alphabet): இணையத் தேடல் மற்றும் விளம்பரத் துறையைச் சேர்ந்த இந்நிறுவனம், முக்கியமாக கூகுள் செர்ச் (Google Search), யூடியூப் (YouTube), ஆண்ட்ராய்டு (Android), கூகுள் மேப்ஸ் மற்றும் ஆட்சென்ஸ் (AdSense) போன்றவற்றை உள்ளடக்கியது.
- அமேசான் (Amazon): உலகளாவிய ஆன்லைன் வர்த்தகம் மற்றும் AWS (Amazon Web Services) மூலம் உலகின் பல பெரிய இணையதளங்கள் மற்றும் செயலிகளுக்குத் தேவையான சர்வர் (Server) சேவையை வழங்குகிறது.
- மெட்டா (Meta): சமூக ஊடகங்களான பேஸ்புக், இன்ஸ்டாகிராம் மற்றும் வாட்ஸ்அப் போன்ற செயலிகளை உள்ளடக்கிய நிறுவனம். உலக மக்கள் தொகையில் பாதிக்கும் மேற்பட்டோர் இவர்களது செயலிகளைப் பயன்படுத்துகின்றனர்.
- டெஸ்லா மற்றும் ஸ்பேஸ் எக்ஸ் (Tesla & SpaceX): மின்சார வாகனங்கள் மற்றும் விண்வெளி தொழில்நுட்பத் துறையைச் சேர்ந்த நிறுவனங்கள். டெஸ்லா மூலம் மின்சார கார் துறையிலும், ஸ்பேஸ் எக்ஸ் மூலம் விண்வெளிக்குச் செல்லும் செலவைக் குறைத்தும் அமெரிக்காவின் தொழில்நுட்ப வலிமையை உலகிற்குப் பறைசாற்றுகின்றன.
இந்த ஏழு நிறுவனங்களும் வெறும் வணிக நிறுவனங்கள் மட்டுமல்ல; அமெரிக்காவின் தொழில்நுட்ப வளர்ச்சியை உலகிற்குப் பறைசாற்றும் டிஜிட்டல் முதுகெலும்புகள் ஆகும்.
5. இரத்தத்தால் எழுதப்பட்ட வளர்ச்சியும் எதிர்காலச் சவால்களும்
அமெரிக்காவின் இந்த அசுர வளர்ச்சி என்பது வெறும் அந்நாட்டு மக்களின் உழைப்பால் மட்டும் உருவானது அல்ல. பெட்ரோ-டாலர் ஆதிக்கத்தைத் தக்கவைத்துக் கொள்ளப் பல நாடுகளில் சிந்தப்பட்ட இரத்தமும், அப்பாவி மக்களின் கண்ணீரும் இந்த வளர்ச்சியின் பின்னால் மறைந்துள்ளன. டாலரின் மதிப்பைப் பாதுகாக்கவும், அதன் ஆதிக்கத்தைத் தக்கவைக்கவும் உலகளவில் பல அரசியல் மாற்றங்களும், போர்களும் நிகழ்த்தப்பட்டன என்பது கசப்பான உண்மையாகும்.
இருப்பினும், இன்று காலம் மாறி வருகிறது. அமெரிக்காவின் இந்த ஒற்றைத் துருவ ஆதிக்கத்திற்குப் பெரும் சவாலாக BRICS (பிரேசில், ரஷ்யா, இந்தியா, சீனா மற்றும் தென்னாப்பிரிக்கா) போன்ற கூட்டமைப்பு நாடுகளின் எழுச்சி அமைந்துள்ளது. பல நாடுகள் கச்சா எண்ணெய் வணிகத்திற்குத் தங்கள் சொந்த நாட்டு நாணயங்களைப் பயன்படுத்தத் தொடங்கியிருப்பது, நீண்டகாலமாக நீடித்து வந்த பெட்ரோ-டாலர் ஒப்பந்தத்திற்கு ஒரு மிகப்பெரிய எச்சரிக்கையாக மாறியுள்ளது.
வளர்ச்சியும் அதிகாரமும் ஒருபோதும் நிலையானவை அல்ல. உலகப் பொருளாதாரம் இன்று ஒரு புதிய மாற்றத்தை நோக்கி நகர்ந்து கொண்டிருக்கிறது. அமெரிக்கா தனது ஆதிக்கத்தைத் தொடர்ந்து தக்கவைத்துக் கொள்ளப் போகிறதா அல்லது புதிய நாணயங்களின் எழுச்சி உலகப் பொருளாதாரத்தை மாற்றியமைக்கப் போகிறதா என்பதைப் பொறுத்திருந்துதான் பார்க்க வேண்டும்.
FAQ’s- அமெரிக்கப் பொருளாதார வளர்ச்சி
அமெரிக்கா எப்படி குறுகிய காலத்தில் உலக வல்லரசானது?
அமெரிக்கா தனது அபரிமிதமான இயற்கை வளங்கள், தொழில்துறை புரட்சி மற்றும் இரண்டு உலகப் போர்களின் போது மற்ற நாடுகளுக்கு ஆயுதங்களை வழங்கி ஈட்டிய பெருமளவு லாபம் ஆகியவற்றின் மூலம் குறுகிய காலத்தில் பொருளாதார வல்லரசாக உருவெடுத்தது.
பெட்ரோ-டாலர் (Petro-Dollar) ஒப்பந்தம் என்றால் என்ன?
உலக நாடுகள் கச்சா எண்ணெயை வாங்குவதற்கு அமெரிக்க டாலரை மட்டுமே பயன்படுத்த வேண்டும் என 1974-இல் அமெரிக்காவிற்கும் சவுதி அரேபியாவிற்கும் இடையே ஏற்பட்ட ரகசிய ஒப்பந்தமே பெட்ரோ-டாலர் ஒப்பந்தமாகும்.
அமெரிக்கப் பொருளாதாரத்தில் தொழில்நுட்ப நிறுவனங்களின் பங்கு என்ன?
மைக்ரோசாப்ட், ஆப்பிள், கூகுள் போன்ற நிறுவனங்கள் உலகளாவிய டிஜிட்டல் சந்தையைத் தன்வசம் வைத்துள்ளன. இந்த நிறுவனங்களின் வரி வருவாய் மற்றும் தொழில்நுட்ப ஆதிக்கம் அமெரிக்காவைத் தொடர்ந்து முன்னிலையில் வைத்திருக்க உதவுகின்றன.
பிரிக்ஸ் (BRICS) நாடுகளின் எழுச்சி டாலரை பாதிக்குமா?
ஆம், சீனா, இந்தியா போன்ற நாடுகள் உள்ளடங்கிய பிரிக்ஸ் அமைப்பு, தங்கள் சொந்த நாணயங்களில் வர்த்தகம் செய்யத் தொடங்கியிருப்பது, டாலரின் ஒற்றைத் துருவ ஆதிக்கத்திற்கு ஒரு சவாலாகக் கருதப்படுகிறது.
அமெரிக்காவின் இராணுவ பட்ஜெட் ஏன் மற்ற நாடுகளை விட அதிகமாக உள்ளது?
தனது உலகளாவிய பொருளாதார நலன்களைப் பாதுகாக்கவும், பெட்ரோ-டாலர் அமைப்பிற்குச் சவால்கள் வராமல் தடுக்கவும், உலகளவில் தனது மேலாதிக்கத்தைத் தக்கவைக்கவும் அமெரிக்கா தனது இராணுவத்திற்காகப் பெருமளவு செலவிடுகிறது.
